近期幫朋友望望佢張中式喜帖設計，一望到新人稱謂，就諗起之前有客人分享過，佢地印好晒喜帖，準備派出去先知道，新郎稱謂應該係 “小兒" 印錯左做 “長男"，好采發現到~~~
我地先認識下中式喜帖稱謂點寫先:
長男：排行最大
次男：排行第二
幼男：排行最小
小兒：只有一位兒子
長女：排行最大
次女：排行第二
幼女：排行最小
小女：只有一位女兒
講番客人情況，新郎有一位妹妹，沒有兄弟、家姐。雖然新郎有一位妹妹，但起喜帖新人稱謂上，記得新郎只計家中兒子數量，唔計姐姐同妹妹；而新娘只計家中女兒數量，唔計哥哥同弟弟。
所以客人最終喜帖稱謂要用 “小兒" 先正確。
